Zanzibar

Dette bildet skal eg bruke som framside på boka eg heldt på å skrive.

På veg tilbake til båten vår etter lunch.

Regntid? Tja...

Hallvard, Frøya og Ylva snorklar i solnedgang.

Ein fantastisk dag på havet. Ja, eg har fletta håret, det tok over
4 timar, og nei, dei hadde ikkje lyst hår! Vi er tross alt i Afrika,
så lysebrunt var det næraste vi kom.

Ylva og meg i aksjon. Vi har eit lite undervannskamera
som vi har brukt flittig denne ferien. Fantastisk stilig å snorkle på
korallrevet ved Mnemba! Kanskje vi må tilbake til Zanzibar snart.
Nokon som blir med?

Vi tok båt frå Dar es Salaam til Stone Town og noko av det første vi la merke til var det vanvittig turkise havet rundt øya. Vi fekk i oss litt mat før vi tok turen til nordspissen av Zanzibar og fant ein fin bungalow 2 meter frå stranda. Igjen bading, soling og snorkling, ein dag var vi på båttur til Mnemba, der det var vanvittig fint å snorkle (ja, vi såg både Nemo og Dorry), og til lunch åt vi grilla fisk på stranda. Sjømaten var kjempegod, men ein dag vart eg litt overmodig og bestilte blekksprut, noko som vart litt for tentaklete for meg. No er det lavsesong, og svært få turistar over alt (i tillegg til finanskrise som har ført til mindre turisme). Vi hadde eit par dagar i Stone Town, ein av afrikas finaste byar (verna av UNESCO). Så tok vi båten tilbake til Dar es Salaam. Lite sjø, men nok til at både Ylva og Frøya spydde. Vi andre såg ein klisjefilm av Mel Gibson. Ei overnatting i Dar, og så tok vi buss til Moshi, var der to netter, og tok buss til Nairobi. Fantastisk landskap undervegs, særleg mellom Arusha og den kenyanske grensa. Kilimanjaro er eit mektig fjell, vi var heldige med veret og fekk sett det stikke opp av skyane! Bussturane har vore spekka med problemer, Hallvard heldt på å gå i lufta mange gongar, men vi kom no fram til Nairobi til slutt:o).

Ferie

Ikkje så lett å få godt nok nett til blogging når vi er på ferie, men eg kan jo oppsummere litt av det vi har gjort. Vi tok matatu til Kericho, og buss derifrå til Nairobi. I Nairobi var vi skikkeleg turistar.Vi hyra inn ein taxi som kjørte oss rundt frå sight til sight, begynte på eit animal rescue centre, der dei hadde elefant- og neshorn-babyar. Vi såg på når dei fekk sitt daglege gjørmebad. Så kjørte vi vidare til Giraffe-dyrehagen, der vi mata sjiraffar. Post tre på programmet var Karen Blixen-museet, det var dyrt og ikkje så bra. Fint hus og fin hage, fort gjort å kikke gjennom, så då hadde vi tid til krokodille og strutse-parken. Den var veldig bra. Vi fekk holde ein liten krokodille, og guiden vår hoppa inn i buret til dei store krokodillane for å erte dei med ein kjepp så dei angreip. Galskap, Frøya lurte resten av dagen på kvifor nokon ville jobbe der frivillig viss dei måtte inn der. Strutsane var morsomme, dessutan hadde dei ein liten sjiraff her og. Ylva og Frøya fekk ri på kamel. Meir er det vel knapt mogleg å skvise inn på ein dag. Vi måtte slappe av litt på hotellet før middag. Det er rart å vere i sivilisasjonen igjen etter tre mnd i Sigowet. Deilig at ikkje alle stirrar på oss absolutt heile tida. Vi tok nattog til Mombasa og hadde ein overnatting der. Fant ein liten kafe med havutsikt i gamlebyen som er ganske fin, og åt pilau mens vi stirra utover havet. Men Mombasa er ingen blivande stad, så vi reiste kjapt vidare til Tiwi Beach, der vi var ei veke. Fantastisk strand, mykje bading, snorkling og strandliv. Apekattane spratt rundt oss, dei åt ut av hendene på oss og kom gjerne inn på rommet for å sjå om vi hadde godis. Etter ei veke fann vi ut at vi måtte vidare, og tok matatu sørover over grensa til Tanzania, til den fantastiske byen Tanga (not!) der vi fant ut at båten til Zanzibar hadde gått samme dag (den går ein gong i veka). Så vi tok buss vidare dagen etter, til Dar es Salaam. Der hadde vi og ein overnatting, og fekk besøkt nasjonalmuseet og vandra litt rundt i byen (fant ein is-bar der nokon av oss (gjett kven) tok heilt av!).